Vegguret - eller rettare sagt: Kroniske smerter

Vegguret står der
heile tida.
Går
heile tida.
Tikk takk, tikk takk.
Jo, tusen takk
for at det berrre er vegguret.
Er råd å få gjort noko, tenkt litt
når det berre er vegguret...
Slag som varslar halv og heil time
er ok,
dei kjem til sine faste tider
og alt har si tid.

Telefonen ringer.
Gir seg ikkje.
Eg tar han ikkje,
men han ringer.
Ikkje råd å få gjort noko,
tenkt noko
før han teier.

Så er det berre vegguret.
Tikk takk, tikk takk.
Takk og lov!

Brannalarm!!!
Må la alt liggja.
Får ikkje gjort noko.
Får ikkje tenkt,
ikkje på anna enn brannalarmen.

Falsk alarm
eller ikkje.
Eg liker ikkje brannalarm.

Nokon krev at det skal vera heilt stille
for at dei skal få gjort noko
tenkt noko.
Eg er godt nøgd med vegguret.

....
 Fleire tankar om meistring av livet slik det er, finn du her: Meistring i kvardagen