Hjernetrim og hjerneføde mot hjernedvale

Så har me fått det stadfesta frå fagleg hald: Hjernen er til for å brukast. Viss me ikkje bruker dei små grå, vil dei gå i dvale ifølge Dagbladet

Bjørnen må gjerne gå i dvale. Litt mindre likar eg når datamaskina mi gjer det. Men hjernen min, den må for all del ikkje gå dvale.

Hjernetrim
Hjernetrim, sier me litt lettvint, når me set oss med Sudoku eller kryssord, som om me treng ei unnskyldning for å bruka tida til slikt. Men skal me tru Åge Pålshammar, nevropsykolog ved Uppsala universite, er det viktig å trimma hjernen.

Meir alvor er det når sjukdom har ramma, og hjernen faktisk må trenast opp att. Kor mange har ikkje vist at treninga gir resultat?

Sjølv strevde eg med minnet og konsentrasjon etter mykje narkose, slik at det blei vanskeleg å lesa ei avis eller følgja med på eit fjernsynsprogram. Men ved å tvinga hjernen til å arbeida, høyra på lydbøker og sjå krim, kom det seg når tida i tillegg fekk hjelp til.

Halda hjernen ung
Ein flokk eldre menn møtest jamleg for å spela sjakk, løysa kryssord og laga middag. Om dei var svært oppegåande fordi dei trente hjernen, eller om dei kunne trena hjernen fordi dei var oppegåande, veit eg ikkje. Men no kan dei i alle fall skulda på Pålshammer når dei lagar god middag i lag etter hjernetrimmen.

Mor mi dreiv og skreiv ned slektsregister for alle familiane rundt om i bygda. Den store slektsforskinga var det vel ikkje, for det meste var avskrift frå bydebøker. Men ho sa ho kjende att namna, såg korleis dei brukte dei i ulike slektsledd og fann ut korleis slektene fletta seg inni kvarandre. Ho hadde ein klar tanke all si tid. Kanskje namneskrivinga var viktigare enn me trudde?

Hjerneføde
Når ein trenar, treng ein sunn kost. Eg har alltid lært at sjokolade er hjerneføde, akkurat slik eg har høyrt at hjernen treng trening. No er dette med treninga altså slått fast av ekspertar. Dei må svært gjerne slå fast at det med sjokoladen også stemmer.